Il tscheiver da Mustér festivescha treis giubileums

HANS HUONDER/FMR
Igl onn 1979 ei il til da tscheiver atras il vitg da Mustér vegnius organisaus per l’emprema ga. Sulettamein duront il temps da Covid-19 ha el buca saviu vegnir arranschaus, schiglioc regularmein. Ils onns 1980 eis el staus il motiv principal ch’ei ha dau in grond moviment tscheivril a Mustér. 1984 ei l’uniun da tscheiver ve gnida fundada e cuort suenter era las guggas «Las Bagordas » e «Las Fifferlottas». Culla Dertgira nauscha – ina veglia tradiziun da pli baul – ei in’ulteriura purschida essenziala vegnida vitier avon exactamein 35 onns. Quels treis giubileums vegnan festivai dils 9 entochen ils 12 da fevrer 2024. Part dil program da tscheiver ei dapi quater decennis era la gasetta da tscheiver «La Sibla». Uonn cumpara ella per la 39avla ga. Naven dalla sonda da tscheiver a Trun, ils 3 da fevrer 2024 vegn ella repartida.

Entschatta cun Dertgira nauscha
Sco igl onn vargau vegn l’entschatta dils arranschaments da tscheiver a Mustér era fatga uonn culla Dertgira nauscha. Aunc avon paucs onns haveva quella liug la sera da gliendisdis tscheiver. «Igl ei secumprovau da far ella il venderdis sera per l’entschatta dil tscheiver», di Gion-Duri Maissen, il president dall’Uniun da tscheiver Mustér che fuorma communablamein cun Placi Flury, Natalia Manetsch, Melanie Maissen ed Arno Maissen la suprastonza da quella. Quella sera vul la suprastonza dall’uniun cumpletar il program cun entginas surpresas. Tgeininas vul Gion-Duri Maissen buca tradir: «En mintga cass envidein nus las anteriuras ed ils anteriurs derschaders dalla Dertgira nauscha a nies giubileum.» Suenter la Dertgira nauscha suonda la sera da recreaziun en halla Cons, organisada da «Las Fifferlottas». Pil til da tscheiver a Mustér ei l’uniun da tscheiver vid preparar in carr. «Els tils a Trun e Sedrun vegnin nus ad esser uonn sco participonts da selvadis», di Gion-Duri Maissen. Sco mintg’onn ha liug la sonda sera il grond bal da tscheiver el Center Fontauna. Quel vegn arranschaus da «Las Bagordas». Terminaus vegn il tscheiver a Mustér da gliendisdis tscheiver suentermiezdi cul tscheiver pils affons e las fami glias en halla Cons.

Glieud che vul s’engaschar maunca
«Il mument essan nus in pugn plein persunas che s’engascha pil tscheiver a Mustér. Leutier ha l’uniun aunc entginas persunas ch’ein promtas da segidar cu e nua ch’ei fa da basegns», di Gion-Duri Maissen che presidiescha
l’Uniun da tscheiver Mustér dapi prest sis onns. L’uniun dumbra il mument rodund 20 commembras e commembers. Animar glieud da s’engaschar en ina funcziun ni l’autra seigi tut auter che sempel: «Biars han luvrau pil
tscheiver duront biars onns. Capeivel ch’els seretilan ella secunda retscha. Legreivlamein ein entginas persunas che han sunau en guggas, entradas ell’uniun ils davos onns.» Alla tscherca ei la suprastonza era da scribentas e scribents per «La Sibla». «Jeu quitass ch’ei stuess dar glieud giuvna che havess plascher da scriver per ella», di Gion-Duri Maissen e manegia: «Forsa stuein nus veramein organisar in mument in’acziun per recaltgar commembras e commembers ch’ein promts da s’engaschar en ina fuorma ni l’autra. Aschiditg che la gruppa activa dil mument ei promta da luvrar pil tscheiver va ei, silsuenter drova ei ina successiun cun nova glieud.» In laud ha Gion-Duri Maissen pigl engaschament dallas scolas che fuorman onn per onn cun lur numeras ina part essenziala dil til. Per finanziar ils cuosts dil tscheiver da quest onn vegn vendiu talers da tschugalata. Els remplazzan las medaglias.